Pêrodayîş
Peynîya Serre
Ma amey restî peynîya serrêka bîne. Baş o. Nika her kes na serra 2023 erjneno. Seba ma kurdan erjnayîşê serrêk qîm nêkeno. Ganî ma pêroyê tarîxê xo bierjnê. Çunke rewşa ma kurdan asayî nîya.
Nê rojan de xeberî benê vila. Xora TV û înternet esto. Her çî dîmenderê (ekran) telefonan ser o aseno. Tora komelkî esta ke ecêb a. Gerîlayan senî ke Xakurk, Zap, Metîna de da pêro, çend saetan ra dima ma dîmenderan de vînenê. Serra 1995 de ma suhbetê xo de vatêne: Rojek yeno şer rasterast yeno weşanayene. Nika şer weşanîyeno. Hem zî yew kameraya serê gerîlayêk ra bestaye, şerî mojneno ma. Ma ruhê gerîla hîs kenî. Perperîşanîya leşkeranê tirkanê tirrek zî vînenê.
Pirodayîşê gerîlayan ra dima ma vînenê ke rojawanê Kurdistanî de, dişmen bi xedarî dano piro. Pirodayîşêk nemerdane. Pirodayîşêk teresane. Dişmen dano cayanê xizmetguzarîyan ro. Kurdanê şaristan (medenî) keno hedef. Xora heqê ci çin o ke hêzanê leşkerîyan zî bikero hedef. Ciwanan keno şehîd. Dişmen wazeno Rêvebirîya Xweser bê çare biverdo. Rêvebirî nêeşko rêvebirtî bikero. Şar nêeşko hewcedarîyan peyda bikero. Naye ra armanc no yo: Dişmen wazeno rêvebirî zeîf kero. Rêvebirî nêeşko rêvebirtî bikero ke kurdî vila bibê. Bê sermîyan bimanê. Dişmen wazeno kurdî cayanê xo yê ciwîyayîşî biternê û şirê. Şirê Ewropa ra heta Amerîka. Çirê? Dişmen winî hesap keno ke peynîya peyêne de Kurdistan bimano ci rê.
Tarîx
Qandê cû ganî ma tarîxê xo bierjnê. Bi kilmî: Wayîrê Girêmiraza verênê ma yê. Wayîrê şorişê Neolîtîkî, şorişê dewan, verênê ma yê. Zerdeş pêxember, fîlozof û mamostayê ma yo. Avesta kitabê ma yo pîroz o. Xorrî ma yê, mîtanî ma. Medî ma yê sasanî ma. Tewr peynîye de zî ÎP 1750î de ma dewleta Zend awan kerda.
Împarator û dewletê merkezî ronîyay û rijîyay. Ma yê kurdî hema zî mendê. Dîn û mezhebî ronîyay û bîyê çin. La kurd, Kurdistan hema zî est o. Est o la dirbetin o. Mabeynê çinbîyayîş û bîyayîşî de yo. Yanî rewşe hende hewl nîya.
Senînîye
Ma do se kerê? Verê verkan, ganî hedefê ma de dewleta tirkan est bo. Ma dewlete pêro nêkenê hedef, ma îktîdar û sîyaseta dewlete kenê hedef. Ma îdarekar û serekanê înan kenê hedef. Çunke hedefo gird nêyeno bin fînayene. Ganî merdim sey gerîla bo. Hedefê xo qij kero û pirodo. Qandê cû hedefê ma de AKP-MHP û Erdogan û Bahçelî est ê. Yanî wina yew sîyaset o. Amac zî rijnayîşê desthilatî yan zî dewlete yo.
Ganî ma verê xo bidê xo mîyan. Ganî ma xiyanetî bin fînê. Ganî ma nermek û sistekan bihêz kerê. Ganî ma kurdanê xorotoxan bikerê aya. Ganî ma korucuyan bîyarî xeta welatperwer ser. Senî ke dişmenî kurdî kerdî vila. Ganî her kurdo ke diaspora de yo xo rêxistin bikero. Verê xo bido welatê xo. Têkoşîn bikero. Bi madî û manevî, piştî bido têkoşînê azadîye. Wina bo beno. Ma benê serkewte.
Ez û Rewşe
Ezo ha Qamişlo de. Her saetêk cayêk ra du beno berz. Şehîd û dirbetî est ê. Ezo destanê xo kena pistanê xo û temaşe kena. Mi dest ra çîyêk nêyeno ke ez bikerî. Yanî sey verê nîyo. Coka mi na meqale nuşt. Wazena bidî dîyarkerdiş ke ganî ma xo xurtêr bikerê. Seke Foza Yusuf zî vana: Ma bi ruhê seferberî xo ver bidê. Ma qetî yo ke benê serkewte.
Peynîye
I. Dişmen dano piro. Xora o bêminet o.
II. Gerîla û pêro şervanî danê piro. Serkewte yê. Do ser bikewê.
III. Beşêkê kurdan -heme hetanê Kurdistanî ra- vejenê û verê xo danê teberê Kurdistanî. Ê gunek ê.
IV. Heme dewletî û sere de NATO, dişmenê ma yê û ma mîyan de yê. Coka rewşe sey tirşikê kurdî ya. Rewşe têmîyankewte ya. Ma do bi mezgêko raver sîyaset bikerê.
V. Heme şorişan de weşî û xemgînî est ê. No asayî yo. Labelê, peynîye de ma kewenê ser. Verênanê ma senî ke no welat ma rê verda, ma zî ajanê xo rê verdanê. La bi hawayêko azadêr.
