Wisarê Emserrî
Zîhnîyet
Zîhnîyet mezg de virazîyeno. No çîyêko mucîzewî yo. La çîyêko bîn zî est o ke ganî ma baş bala xo bidê ser, zîhnîyet tim ver bi holîye nêşino. Mezg eşkeno şaş zî bifikiryo. No semed ra zî merdim eşkeno rayîr ra bivejîyo. Qandê cû ganî ma tim holîye ser vinderê û xo raver biberê.
Mezg herikbar o. Nerm o. Heme hetan ser tewîyeno. No xususîyet hol o. Labelê no xususîyet bi xo ra xeterayan zî ano. Zîhnîyet ke bî qalib, beno sert. Bî îdolojî, êdî xo nêvurneno. Tim sey xo maneno. Ma naye ra vanê dogma. Dogma eke hol xo ca kerd, beno dogmatîzm. Na game ra tepîya êdî zîhnîyet beno problem. Komelî apey anceno. Vera ney zî zîhnîyetê newî vejîyenê warê.
Eke zîhnîyet de vurnayîş û newekerdiş est bo, o wext tim raverşîyayîş est o. Labelê tîya de problemêko gird est o. O zî no yo ke zîhnîyeto newe komelî mîyan de asan ca nêbeno. Coka ê ke zîhnîyetê neweyî ronenê yan zî zîhnîyetî newe kenê, zehmetîyan ancenê.
Problemê ma yo nikayin zî no yo. Têwgêrayîşê Azadî yê Şarê Kurdî naye keno. Labelê hem têkoşerê Têwgêrayîşê Azadî hem zî şar zîhnîyetê newekerdeyî ra bi holî fam nêkenê. Êdî no zî seba Têwgêrayîşê Azadî beno yew problem. Ma çiqas nê problemî de sere vet hende zî benê serkewte. Çîyo ke -bicidî- ma nê dewrî de, ser o vinderê zî no yo.
Îdolojî
Îdolojî bi fikranê sîstematîzekerdeyan yeno pê. La na nêyena na mana ke fikrî nêvurîyenê yan zî nînê newekerdene. Dogmatîzm dest ra reyayîş, bi vurnayîş û newekerdişan beno. No zî karê her kesî nîyo. Pêşengî nê karan kenê. Ganî têkoşerî zî naye ra fam bikerê û xo bivurnê. Tay hetan ra zî vurnayîş ney xo newekerdiş beno. Ganî têkoşerî naye ra amade bê. Çunke serkewtiş bi nê metodan beno.
Paradîgma praktîzekerdişê îdolojî ya. Ganî paradîgma de newekerdiş, xorînkerdiş, hîrakerdiş est bo. Ma vajî demokrasî, ekolojî û azadîya cinîyan de -ke nê benê paradîgma- ganî ma tim xo perwerde bikerê. Bi no tewir Rayberî ra fam bikerê. Çunke famkerdişî reyde praktîzekerdiş beno. Eke yew kes paradîgma ra baş fam nêkero, nêeşkeno paradîgma praktîze bikero.
Vengdayîşê Aştî û Komelê Demokratîkî wina bi mana beno. Nê babetî de, dewletî û desthilatdarî se kenê wa bikerê, hende zî elzem nîyo. Çunke encam bi têkoşînî yeno warê. Eke têkoşîn de ma serkewte bê, desthilatî û dewletê îşxalkerî nêçar manenê ke waştekanê komelî qebul bikerê.
Stratejî
To ke mirdîya xo şer kerd, to ke encam bi dest vist, êdî hewce nêkeno ke ti şer de israr bikerê. Eke to israr kerd, beno ke şer seba to bizerar bo. Xopawitişî ra teber ganî êdî ti şer nêkerî. Çunke beno ke şerê to xizmetê şarê to nêkero. Beno ke bikewo xizmetê tay hêzanê bînan.
Kurdan şer kerd û estbîyayîşê xo îspat kerd. Ganî kurdî xo awan bikerê û biresnê komelêkê demokratîkî. Bêgûman kurdan xo raver berdo, labelê no seba azadî û demokrasîya kurdan qîm nêkeno. Ganî raverşîyayîş bêmabên bêro kerdene. Naye rê zî metodê newî ganî yê.
Têwgêrayîşê Azadî fek stratejîyê şerî ra vera da. Stratejîyê Aştî û Komelo Demokratîkî xo rê binyat gêno. Nê dewrê ma de ke şer zaf yeno ravervistene de, pawitişê kurdan bi stratejîyê Aştî û Komelê Demokratîkî beno. Çunke ma bi şer mirdîya xo qezenc kerd. Êdî teberê şerî de ganî ma xo rê rayîran akerê. Yo bîn zî dinya de şerê 3. yeno kerdene. Hêzanê hutan xo amade kerdo. Ma bi şer nêeşkenê înan bin fînê. La ma eşkenê bi xo perwerdekerdiş û rêxistinkerdişî ya raver şorê.
Stratejî ser o zî yew têkoşîno pêt est o. Bi vengdayîşê 27 sibate 2025 ra nat zaf gale yeno kerdene. Sere de dewleta tirke, xeylî hêzî nerasterast vanê: Şima çi rê şer nêkenê? Naye ra zî ma fam kenê ke şer ma rê çîyêk nêano. Bi şer ma çîyêk bi dest nêfînenê. Êdî serkewtiş bi têkoşînê aştî û demokrasî beno. Tirêm ma naye rê amade yê? Ma nême ra nêm amade ye. La ganî ma se ra se amade bê. Wina nê dewrî de şaro kurd û şarê bînan eşkenê serkewte bibê.
Sey Hamas, Hizbûllah, Beşar Esed, Îran û Tirkîya ma serewişkî bikerê, ma do hetê hêzanê girdan ra bêrê derbkerdene. Seba ke wina nêbo Girawa Îmralî de têkoşînêko tarîxî yeno kerdene. Ma bi nê têkoşînî ser kewenê.
Taktîk
Taktîk metodê têkoşînkerdişî yo. Rojane ma çi bi çi bikerê, no beno taktîk. Ma do çi karî senî bikerê? No beno taktîk. Taktîk demkilm, demmîyanên, demderg beno. Senînîya sîyaset û çalakîyan beno taktîk. Coka bi hawayêko rast taktîk ravervistiş elzem o. To karêk, çalakîyêk kerd, la taktîkê to rast nêbo, kar bi hawayêko serkewte nêşono sere. O wext zî ti fikirîyenê ke sîyaset yan çalakî xelet ê. Ney! To taktîk hol dîyar nêkerdo, coka ser nêkewtî.
Ganî taktîsyen îdolojî ra baş fam bikero ke bieşko taktîk dîyar bikero. Heke winî nêbo, bi taktîkanê kehanan paradîgmaya newe ke to kerd pratîk xora sere de kenê vindî. Coka babetê pêşeng zî babetêko elzem o.
Seba servistişê taktîkî, ganî şexsîyetî zî demokrat bê. Aştîwaz û pawitoxê Komelê Demokratîkî bê. Fikir û şexsîyet ganî yewbînî temam bikerê. Fikir û zikir sey yewbînî bibê. Eke wina nêbo şar sermîyanan cidî nêgeno dest. Bi înan ra çarenusa xo nêkeno yew. No zî beno sebebê zeîfîyan.
Seba her problemî, sere de ganî taktîk ser o bêro fikirîyayene. Seba her raverşîyayîşî, verê verkan, ganî ma verê xo bidê taktîkî ser. Ti do karêko serkewte bikerê, ti do projeyêkî serfînê la taktîk çin o yan xelet o; o wext madî û manewî to xeylî çîyan kenê vindî. Ti bi şarî danê vindîkerdiş. Coka wina taktîk beno elzem.
Sey Wisarî
Emser varan û vewr varenê ha varenê. No seba gandarbîyayîş û kewebîyayîşê xoza hol o. Hênî, la û royî herekîyenê. Heme heywan û teyr û tûrî xoza ra feyde gênê. Cuye bena gandar.
Seba merdiman zî wina yo. Rîyê erdî beno cenet. Zerrî bena hîra. Moral beno berz. Merdim ke xo vera mîyanê vilikan dano, zaf beno şa.
Xozaya komelê ma zî nê wisarî de wina ya. Zîhnîyet, îdolojî, demokrasî, aştî, azadîya cinîyan; serê Rayberî ra sey varanê nê wisarî varenê. Mimkun nîyo ke ma bi nê varayîşî serkewte nêbê.
Roşanê Newroze de ame dîyene ke şaro kurd rayîrê xo girewto û şono.
Şero ke serê rojawanê Kurdistanî de ame kerdene de ame dîyene ke şarê kurdî xo ardo pêser. Netewa Kurd bi felsefe, îdolojî, sîyaset têwgêrena. Sîstemê netewî raver şono. Nê rojanê têmîyankewteyan de ma bi sebir û bi têkoşîn ser kewenê. Bi nê serkewtişî boka ameyox şarê ma rê xeyrên bo.
