Nuştox: Azad Ararat

Merhele (15ê Tebaxe)

Ge-gane yew merdim, yew merdim nîyo. Tayê merheleyanê tarîxî de, yew merdim beno neteweyêk, beno dinya, beno merdimîye. Kesêk xo winî virazeno ke beno feza. Sere ra heta cêr beno mana û zerrîya mîlyonan de cayê  xo gêno.

Rayber Apo kesêko wina yo. Ey kesayeta xo de, netewêk bigan kerde. Dor û verê xo zergûn kerd. Pêde-pêde sey gilanê daran, xo veracor hîra kerd. Bi xo de destpêkerdişî, dest pê kerd. Seba rayîrşîyayîşî de serkewte bo, bi embazanê xo ya xo bihêz kerd. Nê embazanê ey ra yew zî Fermandar Egîd o.

Fermandar Egîdî xo hênîyê Apoyî ra weye kerd. Peymeyanê Rayberî ra binyat rona. Xo awan kerd. Herêmêk de dest pê kerd û game bi game raver şî. Bajar, deşt, çîya; heme waranê têkoşînî de, serkewte ravêrd û şî. Teberê welatî de, sey layanê welatî herekîya. Serê koyanê welatî de, vera dişmenî hêlî bî. Seba şar û gerîlayan, xezala kurdistanij bî. Tim ancîyayêne veracor. Bi ser û ber bî. Kurdistan sey hêga bî, ey mîyan de pale kerdêne, bi paleyîye xêr û ber arê dayêne. Bereket kewtêne ko û dewanê Kurdistanî. Wina çêrîye kerdêne ke dişmen tersan ver ranêkewtêne. Embazî, şêlig (girse:kr, kitle:tr) dor û verê ey de ameyêne pêser. Galgalêk dest pêkerdêne, felsefe, sosyolojî, ceng; pêro seba xoserî û azadîya Kurdistanî.

Merhele

Serra 1973, destpêkerdişêk cîya bî. Merheleyêk îdeolojîk, merheleyêk serûberkerdişê partîye. Dişmen ke xedar o, se kenî? Dest bi merheleyêk newe kenî. Şimşîr gênî xo dest! Hetê mezg û hêza laş ra xo kenî bihêz, ma sewbîna se kenî? Mehsûm Korkmazî şimşîrê felsefe, îdeolojî, hizir, rêxistin girewtibî xo dest. Winî dayêne piro ke, tim serkewte, tim raver. Merheleyêk, wina bi serkewte vîyarna. O û dor û verê ci de xeylî kadroyê raver pîya, merheleyêk de binyat rona ke, Têgêrayîşê Azadîye yê Şarê Kurdî hertim ser bikewo.

Nika ê cayanê botanij de, boya şîîran bena berz. Serê lewê ciwanan de nameyê Egîdî. Ma ke Erdal û Bedran, Çîçege û Siltane rê sipasdar ê, ma do rêça înan de, tim raver şirê. Sipasdarîye wina bikerê bi mana, manayan de manayan bizêdnê ke reyêka bîne, no şar êdî bindestîye de nêmano.

Ewro Ra Tepîya

Ma bi felsefe û îdeolojî dest pêkerd. Bi çeke estbîyayîşê xo îspat kerd. Ewro zî galgale kenê ke ma se bikerê. Gamî yenê eştene. Şaro bê pawitox êdî beno şaro wayîrê pawitoxî. Hetêkê ma yasa, hetêkê ma komelkî yo. Hetêkê ma tewrê dewlete beno, hetêkê ma komelbîyayîşî de şono. Reyna hewcedarîya ma bi egîdan est a. Hewcedarîya ma hemleyan rê est a. 15ê Tebaxe, bi tebaxanê neweyan manadar bena.

Ma zîyadêr vera îşxalkeran têkoşîn kerdêne. Na game ra tepîya, ma vera zeîfî, qefçilî, apeymendoxan têkoşîn kenê. Na game zî yew merhele ya. Coka hewcedarîya ma bi serkewtişanê neweyan est a. Welat û teberê welatî de, hêzê ke ma vîyarte ra girewto, ameyoxê xo awan kenê. No ma dest de yo. Vera tarîtîye ma do têkoşînê roştîye bikerê.

*şîîrêka kurmancî, 15ê Tebaxe ser o ya.

*meqale youtube ser o bigoşdarê.