Tişrîn

Name: Tişrîn

Peyname: Xoverdayîş

Ca: Royê Firatî

Maya xo ra bîyayîş:01.01.2025

Nameyê maye: Kurdistan

Nameyê pî: Welat

Tişrîn nameyo ke nê peyênan de keweno goşanê şima ver. Tişrîn vayêko pêt o. Tişrîn vengêko pir bi hêz o. Coka xo erzeno goşanê her kesî ser. Goşan qul keno. Keweno goşan mîyan. Zereyê serê her kesî de keno gumegum. Tay kesan keno gêj. Tay kesan zî xurt keno. Winî xurt keno ke o kes çi cinî çi zî camêrd bo, wazeno 7 wazeno 70 serrî bo, xo erzeno ver. Vano Tişrîn!

Tişrîn yew qeçek o ke newe ma ya xo ra bîyo. Tişrîn zaf xasek û rindek o. Çi heyf ke ganî bêro pawitene. Çunke hêzê tarî est ê ke wazenê Tişrînî bikerê binê bandura xo.

Sere de kêna û lajekanê kurdan, kêna û lajekanê ereban û pêro şaran, bire dayo ke ey bipawê. Çunke o seba dor û verê xo kesêko bi ber û bereket o. Çunke hêzanê tarî û fekgonin wazenê ey ma dest ra bigîrê. Wazenê sere de gurçike pêro endamanê laşê ci bigîrê û biroşê. Biroşê hêzanê girdan, zengînan. Nê welatanê girdan, nê zengînî bi se serran o ke gonîya merdimanê Tişrînî damarê înan ra ancenê. Nê cinawirî wazenê ajê Tişrînî çin kerê.

Winî meewnê ci ra ke Tişrîn yew gede yo. Ney! Tişrîn game bierzo kotî, uca beno kewe. Her keso ke boya ci bibo teng, eke Tişrînî vîneno, ca de yeno xo ser, beno aya. Tişrîn hemrayê xezalan, arwêşan û zerencan o. Înan rê awe peyda keno. Bax û baxçeyan ano pê ke ê tey şa benê. Tişrîn xo verdano rayanê henarêre, mewêre, sayêre û ê zî gilanê xo sey gilayanê kênayanê xoverdayox kenê derg.

Haho! Rewşe bîya têmîyankewte. Hetê vakurî ra vayêko serdin yeno. Yanî vayê vakurî. Şima zanê senîn o. Banan rijneno. Daran bin ra qilayneno. Hênîyan keno wişk. Rîyê erdî keno sîya. Kênayê gil beste, lajekanê gonîgerm, pêro merdimî verê vayê vakurî de bend ronanê. Çi heyf! Tişrîn dejan mîyan de, kêna, lajekî pêro merdimî dirbetin.

Ya Xizir! Tu Est Ê

Ya Xizir! Tu est ê. Ê kênayan, ê lajekan ra yewî wina vat. Şima nika vanê no kam o? O BIRÛSK O. Ziwanê ma de ma vanê VIRSIK. Birûsk bi per o. Nika Birûsk perranê xo dano piro û şino. Zehîr dekeno zerrîya hêzanê tarîyan. Adir varneno serê înan ser de. Ê kiştoxan, ê fekgoninan rusneno binê erdî. Rusneno cayanê tarî û serd. Nika her kes vano ke Birusk Xizirê dewrê ma yo. Kam ke tenge de bo, xo resneno ci. Heq bo, pîr bo Birusk Xizirê dewrê ma yo. Tişrînî wina sevekneno.

Kênayan û lajekan kerdenanê Birûskî bi çimanê xo dî. Merdimanê dîndaran rê zî bî meraq. Waştêne bizanê ke dor û verê Tişrînî de se beno. Dîndaran verê xo da Royê Firatî. Wexto ke dîndaran Birusk bi çimanê xo ya dî, erbaneyanê xo girewtî xo dest û dest bi cenayişî kerdî. Yew rîtuelo mîstîk! Dîndarî dor û verê Tişrînî de, dor û verê dîndaran da pêro mezhebî. Wina dewrêko newe dest pê kerd.

Merdimîye

Êdî Tişrîn namedar o. Dinya de kam ke est o verê xo çarneno Tişrînî ser. Tişrîn yew senfonî yo. Tişrîn yew seremonî yo ke dîmenderan de yeno dîyene. Tişrîn bîyo yew deyîra rindek. Heme hetan ra yena eşnawitene. Tişrîn roj, hêzanê tarî şewe, Tişrîn germ hêzanê kiştox serd, Tişrîn yew deyîra hingimên, kiştoxî zehîr. Wina yew destan ameyo were.

Tişrîn şaristanan keno roşn. Pîzeyê erdî keno mird. Cuye keno weşêr. Qandê cû bale anceno xo ser. Ti vanê qey kilîtê cenetê rîyê erdî destê Tişrînî de yo. Coka masayanê gilover de beno babetê munaqaşa.

Û Tişrîn

Şenik bi şenik beno pîl. Beno hêvî.