Roşna

Yew kênaya dimilî. Waranê xoverdayîşî yê Amedî ra ya. Temenê xo yê ciwanîye de, xo vera piroblemanê welatî berpirsîyar dîyêne. A yewe ra, aye verê xo da koyî, tap û tumanê welatî. Suyeyanê welatî de dayêne pêro. Hetê bînî ra xayinî est ê. No sey çarenuştişêk o. Bi seyan serrî yê ke, kurdî ha no hal de yê. Kamcîn serewedaritiş û xoverdayîşî de, çêrî est bê, ma vînenê ke xayînî zî est ê. Sey kerga sîyaye, xayînî tim pilosîyenê xoverdayox û çêran ra. Xoverdayoxî cuya şarê ma tim kenê sey wisarê verênî. Labelê xayinî tim asmênê welatî kenê puk û zulmat. Roşna.

Roşna!

Cinîyêk a. Yew cinîya ê xoverdayoxan ra ke ê peynîye de xo kendalan ra erzenê war. Ê xoverdayoxê ke fîşeka peyêne seba xo wedarenê. Eke dor û verê ci bibo teng, fîşeke nanê çareyê xo ra. A embaz û hemraya înan a.

Roşna!

Gelîyanê bi ber û bereket de, rayîr akena ke şar bi şadî, ver bi asoyê azadî ro, bikewo mîyanê têgêrayîşî.

*Bitikîne, Helbest: Leyla Ye

Roşna!

Aye çem û layan de, porê xo şûtêne. Porê xo verdayêne ver vayê bakurî. Winî zî şane kerdêne. Pê naye şad bîyêne. Çunke poro serbest verdîyaye, zerîya pêt ra yo.

Yew kulo sîya. Wenişto serê zerrîya ma ser. Teslîmkarîye! Na çi tewir nêweşî ya ke pistanê ma vera nêdano. Tîtikanê koyan de serkewte, maseyanê paytextanê dagirkeran de, binkewte. Dişmentî bê minetî ya, la kurdo teslîmkar! Ma ê kurdî ra çi vajî?

Roşna!

Şaristan bi şaristan gêra. Têkoşîn kerd. Çalakîyanê leşkerîyan de, fermandar bîye. Şîyayîşê hedefanê dişmenî ser. Bi kîn, bi nefret. Pirodayîşanê serkewteyan de, para aye dîyar bîye tim. Apeyameyîş, xo seveknayîş, a pisporê nê karan bîye.

Zerîya pake reyde, cuye munitêne. Sade û zelal a a. Tim bi xozayî têgêrayîş kerdêne. Sey awa honike, herekîyayêne zereyê zerrîya embazanê xo.

Çiweyê polîs û cendirmeyan. Tedaya sazgeh û dezgehan. Nêbîyêne! Ciwîyayîşo sey bindestanê kanan. Bi hawayêko modern. Nêbîyêne! Serdestîya merdimanê qefçilan. No werdo winasî nêwerîyeno. Na awa tahle nêşimîyena. No hewayo qilêrin nêancîyeno. Coka têgêrayîş ganî bi. Roşnaye verê xo çarna xoza. Pezkovî, simore, vengê mîlçikanê cîya bi cîyayan, mar, hes, bewranê kovî, zerenceyî; beybune, dimêga, guldexwîn, vilikasure, kenger û tar û tûrê reng bi reng, tamweş, nê rindekanê welatî reyde ciwîyayîş manedar bi.

Kênayê porderg û asî, xortê simbêl newe vejîyayî est ê, waranê beybûne û simoreyan de. Roşna xo verda ciwîyayîşêko winasî mîyan. Aye zanayêne ke cenet û cehenem binê erdî de nîyo. Rîyê erdî de, dagirkerîye cehenem, wareyî, gelî, cenet ê. Yew problemo yeman est bi ke o zî bêwayîrîya cenetî bîye. Qandê cû ê xortî, kênayî xo erzenê ver. Wayîr vejîyenê.

*Bitikîne, Dokumanter: Dayîkbûn Di Himêza Gerîla Da

Tirêm Şoreşgerîye Çik A!

Şoreşgerîye serbestî nîya. Şoreşgerîye azadî ya. Tirêm azadîye çik a? Azadî xo rêxistinkerdiş o. xo bihêzkerdiş o. Bi zerrî ra xo neçarê têkoşîn kerdişî dîyayîş o. Şoreşgerîye bi hawayêko rast bîyayîşê wayîrê wijdanî yo. Tirêm wijdan çik o? Wijdan: Vera kerdenanê xirabinan yê komelkî û yê dewlete de, xo berpirsîyar dîyayîş o. Tirêm xo berpirsîyar dîyayîş qîm keno? Ney. Xo berpirsîyar dîyayîşî reyde, ganî têgêrayîş bibo. Têgêrayîş çik o? Heme hetan ra, bi manaya pêroyine de, kerdişê çalakîyan o. Şoreşgerîye bi exlaq bîyayîş a. Ancîna, tirêm bi exlaqbîyayîş çik o? Bi hawayêko hemdem, bi mezgêko raver, holîyan û xirabîyan yewbînî ra cîya kerdiş o. Holîye amac girewtiş o. Tirêm holîye çik a? Raverberdişê komelî, normalîzekerdişê têkîlîyanê komelkîyan, şad kerdişê pêro komelî yo.

Eke ti şoreşger a, nê karan pêro danê xo ver. Tirêm kesêke eşkena hende karan bikera û serkewte ba. Ney? Kesek nêeşkeno. Labelê eke şoreşger ba, eşkena. Tirêm senî eşkena? Hema bi kilmî: Tim xo musnenî. Heme halan de, xo perwerde kenî û raver benî.

Roşna!

Yewêka winasî ya. Sere de musaye gerîlatîye. Bade cû bîye fermandar. Vera gangêran da, gan pawitêne. Pawitiş tena xo bi hawayêko ganî cuye de girewtiş nîyo. Pawitiş o yo ke ti gan gênî, gan danî. Peynîye de, alaya welatî berz kenî. Roşna wina bîye. Nê karan de jêhatî bîye.

Perwerde karêko zehmet o. Merdim perwerde kerdiş, karan ra karêko tewr giran o. Roşna hem xo perwerde kerdêne, hem zî embazanê xo. Tay şaran xo rê pergale ronayo. Zanîngeh de wanenê. Benê perwerdekar. La yê ma. Yê ma senîn o? Seke Roşna zî kerdêne. Binê mazêre de, verê kuç û kemeran de, zor dayêne xo ke çîyêk bimuso. Musnayîşî ya bimusno. Qandê cû şoreşgere bena mamoste. Ê nêvanê mamostayê şarê ma çin ê. Wa hema winî bo. Seba raverşîyayîşî, şorişgêr beno çimeyê heme çîyan. Roşna zî wina bîye. Çimeyêko hol bî, seba şarê ma û seba şorişê ma.

Koyan de serrî vîyartî. Êyê ke bîyêne nemerg, êyê ke bîyêne gazî est ê. Êyê ke zerrî ra bîyê lete bi lete, zîyadêr ceht kenê. Ceht kenê ke welato letekerde bîyarê pêser. Şaro ke yewbînî ra cîya bîyo, bikerê sey yew laşa bi tenduriste. Vera kayanê dişmenî de, serkewte bê. Xayinan de, bidê pêro ke xayîntîye bin fînê.

Na rey qor ame rojawanê welatî. Labelê problemêk est bi. O zî no yo ke hetê nê welatî deşt o. Şer zî dewek, dewe, şarçe û şaristanan de yeno kerdene. Çareyêko bîn çin o. Ganî Roşna xo bimusna nê şerî zî. Pêrodayîş û operasyonan ra dima, awankerdişê komelêko newe, beno karêko girîng. Roşna no zî kerd. Şaristanan de, berpirsîyarîya hêzanê seveknayîşê mîyanên, girewte doşanê xo ser. Seba saxlem kerdişê asayîşî, no kar ganî biameyêne kerdene. Labelê ne tecrube est o, ne zî derfet. Sifir ra dest pêkerdiş zî zehmet o hertim. Xora badê gerîlatîye, êdî kênayanê kurdan, hêzanê asayîşî mîyan de zî ca girewtêne. Hol o. Labelê no kar do senîn bo. Reyna Roşna metodo zernin xebitna. O zî no bi ke xo bimusne û bide musnayîş. To çiqas xo musna, hêzanê xo zî hende musnenî. Na babete de zî Roşna jêhat bî.

Babetêko Taybet: Aborî

Aborî karê her kesî nîyo ney? Bi serranê derg û dila, yew gerîlatîye bikero, badê cû bêro û girweyê aborî bikero. Ecêb! Senîn beno! Beno, hem zî hol beno. Eke to zerîya xo pêt girewte, beno. Eke roj û şewe, babete ser de, serî bidejnî, beno. Gerîlatîya koyanê heybetinan ra dima, problemanê şaristanan û çareserkerdişê piroblemanê komelkî. Na rey aborî. Seba şerî aborî. Seba komelî aborî. Vera çember û tecrîdî, peydakerdişê hewcedarîyê komelî. Hende asan nîyo. Çunke dewletî wayîrê yew pergale yê. Statuyê înan yeno şinasnayene. Coka karê aborîkaran asan o. Ti bê yew cografya ke dorûverê ci girewte de, dest bierze aborî. Mezg vindeno. Peynî bi fikirîyayîşan yeno. Ney, ney winî nîyo. Felsefe ameyo dîyarkerdiş. Yeno vatene: “Çîyêko nêbo nêno. To vat beno, beno.”

Nê serranê peyênan de, Roşna aborî îdare kerdêne. Bi usul, bi qayde, bi ser û ber. Yew lejker senî beno aborîzan? Wexto ke şar bê wayîr û sermîyan bo, şorişgêr beno heme çîyê şarê xo. Hem koyan de meterîsan virazeno, hem zî deşte de citkarîye keno. Dest erzeno bazar û bazirganîye keno. Seba ke şar vêşan û têşan nêmano.

Estaneke û vîrardeyan de, tim ma rasta vatişêk yenê. Vanê ke: “Ê rojan de, mayan qeçekî eştêne.” Rewşe winî bena xirabin ke şêlig nêçar waranê xo terneno û şono. Dişmen winî zulim keno, ê kişt kişt, ê darde kerdî kerdî, yê mendeyî zî ramenê waranê durîyan. Seba ke estaneke rojawanê welatî de dubare nêbo, ganî sîyasetêk aborî est bo. Roşna wina ceht û xîret kerdêne ke şar waranê xo de bimano. Wayîr bi welatê xo bivejîyo. Mayî qeçekan rayîr de nêerzê û nêşirê.

Şorişgêrî nêzewecîyenê. Keye nêronanê. Nêbenê wayîrê qeçekan. No seba serkewtişî yew peym a. A yewe ra yo ke şorişgêrî heme qeçekanê şarî, sey qeçekanê xo vînenê. Winî zî sînenê. Rîyê nê ceht û xîretî ra yo ke rojawanê Kurdistanî de, emser 800 hezarî wendekaran dest bi wendişî kerd. Zerîya Roşna şar û welatî ra bestaye bi. Qandê cû hetê şar ra zî ameyêne sînayene.

Heme çî wina weş û rast nîyo. Dizekî est ê. Winî çimvêşan ê ke nêno vatene. Sîxûrî est ê, seba se dolar dades têkoşerî danê şehîd kerdene. Kesî est ê, bêîrade, bêhêz û taqet ê ê. Kesî est ê, seba înan netewe, keye û kulfetê înan o. Kesî est ê, çim verdanê erjanê hevparan yê netewe. Duştê nînan de zî ganî aya bî. Roşna kesanê winasîyan ser fikirîyayêne. Fikirîyayêne ke vernîya înan bigîra û bêro girewtêne. Aye nêverdayêne ke bertîl bêro dayene, yan bêro werdene. Gêrayêne merdimanê pakan ke înan reyde bigirweyo.

Nê serranê peyênan de, birreyêke ameye girewtene. Hêzê zirî yê dinya, bi Tirkîya ra pîya, birre kenê pratîk. Birre zî na ya ke ganî rojawanê Kurdistanî de, vakurijî nêmanê. Bi na birre amanc zî o yo: Şorişê rojawanê Kurdistanî bigîrê binê xizmetê xo. Fina di taktîkanê esasîyan xebitnenê. Yew: Çinkerdişê fîzîkî yo. Ma naye ra vanê kiştişo fîzîkî. Yan kiştişo sûr. Yo diyin: Kiştişo sipî yo. Bi naye wazenê kesan bi hawayêk teslîm bigîrê û seba amancanê xo bixebitnê.

Roşna!

Seba ke aye karêko krîtîk û girîng kerdêne, bîye amancê nê zir hêzan. A roje. A roja sîyaye. Asmênî de hewrê sîyayî. Şaristan û geme de sîxurê qefçilî. Asmênî de roketê dekerde. Rayîr de dame. Kîşte de yew sermîyano têkoşer. Lajê ci şorişgêr. Bi zerrîweşî dewe û şaristanan ra vîyartêne. Karê înan est bi. Waştêne pergala xo pêt bikerê. Ganî kar bi ser û ber bo. Sey şîyayîşê veyve, şîyêne karî ser.

Şarê kurdî teslîm nêno girewtene. Heta Rêber, Partîye, kadro est bê. Rêberî rayîr xêz kerdo. Temam o. Bêqusur o. Partîye xo îspat kerde ke çi partî ya. Seba kurdan roştî ya. Kadro zî têlî yo. Keweno çimê dişmenî. Înan gore ganî bêro çin kerdene. Bêro çin kerdene ke, şar sey meyît bimano raste de, ke bi gor keyfê xo pê kay bikerê.

Roketêk Gina Maşîne Ro

Roket gina maşîne ro. Çardorî bîy adir. Roşna xo eşte teber. Labelê, çi heyf ke roketî têpey varayêne. Nê helê winasî senîn ê gidî! Ma kam zaneno ke. Laşe bena lete. Goşt veşeno. Çîzînîya goştî goşan kena kerr. Kesanê derûdorî de, bêçareyîya kambaxe. Maşîne veşena. Gonî veşena. O por verê vayî de, ameyêne şane kerdene, veşeno. Zerrîya kesanê derûdorî veşena, mezg vindeno, nêxebitîyeno. Heyf!

Roşna!

Tirêm nefeso peyên senîn bî. A hele de, ti çi fikirîyayêne? Ez vana qey, zerrîya to ya ke gonî ci ra şîyêne asan bîye. Çunke to bi mirdîya xo têkoşîn kerd. Yewa sey to, do senîn doşege de çimê xo padayêne. Winî qet nêbîyêne. To vat çêr, ceng û pirodayîşî de, reseno nefesê peyênî.

Roşna!

To pileyo tewr berz na doşanê xo ser û şîya. To ra bextewerêr kam est o ke!

*Bitikne, Vîdyoyê hîkayeyî: Roşna Egîd (kiner.info)

*Bitikîne, Gotar: Arîn Mihemed/ Qanun An Sinc