Tim Aver
Kurdî bi Têgêrayîşê Azadîye bîyê wayîrê yew ferasetî. O feraset zî o yo ke beşêkê kurdan winî fikiryenê ke tim aver şirê. Qandê cû kurdî bîyê wayîrê kerametî. Her cayo ke kurdî tey est ê, ûca de yew pergala înan zî est a. Kurdî winî musayê ke kotî de bê ûca de wazenê xo bi xo xo îdare bikerê. No zî çîyêko zaf hol o. Nêbeno nesîbê her şarî yan komelî.
Labelê ma biewnê kemaneyanê xo ra. Çunke tay piroblemê ma estê. Ganî ma nê pirobleman çareser bikerê. Xo bi xo, xo rê astengan nêvirazê. Vernîya xo akerê. Winî zî dahîna şirê aver. Nê kemaneyan ra yew, nêşinasnayîşê dişmenî yo. Ganî ma dişmenî hol bişinasnê. Çunke ma vera ey de têkoşîn kenê. Dişmen (sere de dewleta tirke) çi rey bi holî ma ra nêewnêno. Çi rey hewlîya ma zî nêwazeno. La ge gane çîyanê başan ano ziwanî ser. Wexto ke nê çîyan ano ziwanî ser, tay kurdî winî hesibnenê ke temam o û êdî rewşe bena asan. Ney! Dişmen heta hela peyêne zî do biwazo kurdan bin fîno. Heke ge gane çîyanê başan vajo zî seba ke binê ê çîyanê holan de xirabîyêka girde bikero, nê çîyanê başan vano. Demîrel, Erbakan, Ecevît, Erdogan pêro wina bî.
Pêameyîşî
Nê wextanê peyênan de, rewşa Tirkîye bedilîyaye. Rewşa aborî zaf bîya xerab. Desthilatî ameya teşhîrkerdene. Koyanê Kurdistanî de çêran hol dayêne piro. Ser de zî erdlerz bi ke rîyê dewlete dahîna deşîfre bi. Rastîya AKP û MHP’yî dahîna ameye zanayene. Badê cû ma kewtî pêvajoya weçênayîşî. Seba ke yew partî bi serê xo nêeşkena biba desthilat, viraştişê îtîfaqan bîye girîng. Naye ser o her partîyêk îtîfaqêk de ca girewt. Labelê seba seroktîya Komara Tirkîye, nê îtîfaqî qîm nêkenê. Qandê cû îtîfaqêk zî seba seroktîya komare ame viraştene. Nayê ser o Kemal Kiliçdaroglu şi û serdana HDP’yî kerd. Pêro madeyê HDP’yî qebûl kerdî. No çîyêko hol o. Labelê sîyasî yo. Pêameyîşêko taktîkî yo. Seba binvistişê Erdogan û AKP’yî yo. Hewce nêkeno merdim seke pêameyîşêko sitratejîk bo bigîro dest.
Badê, ma medyaya komelkîye de dî ke tay kurdê elewîyî hesabanê xo de nusnenê û Kemal Kiliçdaroglu rê vanê pîro. Heyran! Pîr vînayişê Kemal Kiliçdarogluyî, bi destê xo erêkerdişê kiştena xo yo. Yo bîn zî heke ti Kemalî ra vajê pîro, pîranê bînan ra nêbeno heqaret? Ti senî K. Kiliçdaroglu û pîranê ke ameyê dardakerdene anê têhet. No nêbeno yew korfamîye? CHP pêro pîrê to yê welatperwer û xoverdayoxî darda kerdî. Reyna a CHP ya ke kurdêko elewî kerdo serek. Wazeno bi destê ey peynî bi kurdan û pêro kurdê elewîyan bîyaro. Hema mîyanê rojêk de senî bi ke to sifato pîro na pira. Ma hende zî nezanî bena.
Bawerî bi xo ardiş
Kurdî êdî wayîrê yew partî, yew artêş û yew sîyasetî yê. Ê kurdê verênî ke hetê dişmenî ra ameyêne xapînayene nêmendî. Nika kurdî mucadele kenê. Naye ser o sîyaset kenê. Bi sîyasetê xo yê serkewte zî dîplomasî kenê. Ganî bêro zanayene: Ma şaran reyde pêameyîşanê stratejîkan kenê. Dewletan reyde pêameyîşanê taktîkan kenê. Ê kesê ke ma cira vanê şar, benê dostê ma ya stratejîkî. Ê kesê ke sermîyan û berpirsê dewlete yê, înan reyde pêameyîşanê taktîkî virazenê. Bi înan a dostanî nêbena, tena têkoşîn beno, duştê înan de.
Hêvî esta
Peynîye de hêvî kena ke pêameyîşanê taktîkî, vakurê Kurdistanî û Tirkîye de serkewte bê. K. Kiliçdaroglu bibo serekê komare. Partîya Çepe ya Keske zî 100 ra vêşêr parlamenterîye bidest bifîno. Badê cû game bi game normalîzasyon bivirazîyo. Peynîye de şarê kurd sere de, heme şarê ke Tirkîye de ciwîyenê mafanê xo yê netewîyan bidest bifînê.
