Çêrîya 15ê Tebaxe
Amadekerdiş
Serra 1976 de koma şorişgêranê Kurdistanî Ankara ra vejîya û verê xo da şaristanê Kurdistanî. Serranê 1976-77-88 de, Kurdistanî de karê şorişgêrî ame kerdene. 18ê gulana serra 1977 de Hakî Karer ame şehîd kerdene. 27ê tişrîna peyêne de PKK ame ronayene. Badê cû têkoşîn Kurdistanî de hîra bîye.
Na rewşe ser dewlete amadekarî kerde ke Tirkîya de derbe bikera. Rayber Apo pê hesîya û waşt tedbîran bigîro. Naye ser Rayber Apoyî verê xo da teberê welatî. Beyrût de mîyanê şorişgêranê Fîlîstîn de ca viraşt ke kadroyan perwerde bikero. Badê cû şorişgêrî amey û Beyrût de perwerde dî. Her koma ke perwerde dîyêne, verê xo dayêne koyanê Kurdistanî.
Beyrût de konferanso yewin û kongreyo diyin ame kerdene. Perwerde zî bê mabên ameyêne dîyene. Nê serran de kitabê Rayber Apoyî vejîyay. Kongreyo diyin de bire ame dayene ke serra 1983 de hemle bêra kerdene la nêbî.
Nê serran de kadroyê pêşeng ke ameybî tepiştene, zîndanê Amedî de xo ver ro dayêne. Dişmenî waştêne zîndanê amedî de PKK teslîm bigîro. Kadroyanê pêşeng zî na rewşe zanayêne. Coka bi xurtî xo ver ro dayêne. Êşkenceyê nêdîyayî ameyêne kerdene. Çareyêk mendibî ke o zî bi canê xo, xo ver ro dayîş bî.
Newroza serra 1982 de Mezlûm Doganî ganê xo da adirî ver. O bîye Kawayê Hemdem. Badê cû Ferhat Kurtay û 3 embazê ci çalakî kerdî û ganê xo dayî adirî ver. Labelê dişmen nêvindertêne, îllah waştêne ke kadroyan teslîm bigîro ke PKK û şaro kurd zî teslîm bigîro. Eke wina bî, teberê welatî de zî xora PKK nêeşkena çîyêk bikera.
Na rewşe ser o bi pêşengîya Mihemed Xeyrî Durmuşî rojeyê mergî sey çalakî ame veçînayene. Naye ser pêşengî kewtî çalakîye mîyan. Badê şehîd kewtişê Mihemed Xeyrî Durmuş, Kemal Pîr, Elî Çîçeg, Akîf Yilmazî dewlete reyde pêameyîş virazîya û çalakîye bi peynî bîye.
Badê bireyê kongreya diyine ya PKK, ameyêne waştene ke hemle rew bêra kerdene ke êşkenceyê zîndanê Amedî bi peynî bibo. Sîyaseto teslîm girewtişî serkewte nêbo. Hetêk ra amadekarî ameyêne kerdene la heto bînra tasfîyekar girweyayêne ke hemle nêra kerdene. Tafîyekaran waştêne verê kadroyanê PKKyî bidê teverê Kurdistanî yanî Ewropa. Bi no hewa PKK Ewropa de bihelîyo û nêmano. Nê serran de têkoşîn xeylî yeman bî.
Komanê ke vakur û başûrê Kurdistanî de xo ca kerdî, amadekarî kerdêne ke hemle bêra kerdene. Nê serran de humara gerîlayan tay, îmkanî kemî bî. Tecrûbeyê şer xora nêbî. Kadroyan filîstînijan het de -bi taybet Cephe Demokrasî het de- perwerde dîbî la belê hetê piratîkî ra tecrûbe çin bî.
Hemle
Hemleya tarîxî roja 15ê Tebaxe de do biameyêne kerdene. 15 Tebaxe roja reynayîşê Vîyetnam o. Şorişê Vîyetnam zî tesîrê xo gerîlayan ser o zaf bî. A roje, a roja tarîxî de ganî 3 hedefan ser o çalakî biameyêne kerdene. Çalakîyêk Şemzînan, çalakîyek Şax yo bîn zî Dihê de do biameyêne kerdene. Çalakîya şemzînan bi hewayo tacîz vîyart. Çalakîya Şax zî nêame kerdene. Çunke fermandarê koma gerîlayan Terzî Cemal bî ke o bixo sîxur bî. Çalakîya bi tesîr Dihê de ame kerdene. Duran Kalkan berpirsîyarê partîye bî. Egîd fermandar bî. Erdal zî hetkarê fermandar Egîd bî.
Çalakî şewa ke 14ê tebaxe 15ê tebaxe ra bestena de ame kerdene. Heval Erdalî 2 deqeyan de karakolê Dihê zept kerd. Çekî ameyî destvistene. Camîye ra vilaveke ame wendene. Çalakî bi lezkanî û demêko kilm de bi peynî bîye.
Yeno vatene: Kokimêk dewêk de ke nêzdî cayê çalakî ya, vengê çekan heşneno. Naye ser pers keno vano se beno? Kokimî ra vanê kurd ê, vera dewlete de şer kenê. Kokim beno zerrîweş. Vano: Êdî ez eşkena bi zerrîyêke weşe ganê xo bida. Çunke çimanê mi dî ke kurd reyna duştê dewlete de şer kenê.
Na hemleya tarîxî ra ma vanê VEJÎN. Yanî newe ra bi gan bîyayîşê şaro kurd. Hemleya 15ê Tebaxe:
- Şaro kurd newe ra bi gan kerd.
- Kurdan tersê ke dişmenî awan kerdibî şikna. Kurdan merg mirêna.
- Kurdan mîyan de şorişê demokrasî raver vist.
- Bi tewrbîyayîşê cinîyan, game bi game azadîya cinîyan raver şî.
- Kurdan xo şerê kozik û yê dewijan û şerê pêşmerge ra reyna. Hawayêko modern gerîlatîye ronîya.
- Êşkenceyê zîndanan û dardakerdiş ame vindarnayene.
- Pêroyê dinya de kurdî ameyî şinasnayene.
- Kurdî bî wayîrê îradeyêko pola.
Tarîxê ma de sîlsîleyê çêran est o. Ristemê Zalî ra bigê heta Kawayo Asinkar. Selahadînê Eyûbî ra bigê heta Derwêşê Evdî. Tarîxo modern de zî çêrî resayî tîtik. Egîd, Erdal, Bêrîtan, Zîlan, Vîyan ra bigêr heta çêrê peyêne Asya Elî û Rojger Hêlîn; bê hesab çêr û qehremanê ma est ê. No çîyêko zaf bi erje yo. Coka êdî kes nêeşkeno kurdan ver de vindero. Çi împarator çi zî dagirker êdî nêeşkenê komkiştenan bikerê. Eke bikerê zî bedelê ci est o.
Ewro
Emser 27ê sibate ra nat, dewrêko newe yo. Vengdayîşê Aştî û Komelo Demokratîk vengdayîşêko tarîxî yo. Têgêrayîşê Azadîye dest bi têkoşînêko newe kerdo. A yewe ra emser ma 15ê Tebaxe cîya pîroz kenê. Şahadeta pêşeng û fermandaran ame îlankerdene. Elî Heyder Kaytan û Riza Altun yenê şinasnayene. Şehadeta her di pêşengan îlan bî. Şehateda Nuredîn Sofî û Koçer Riha zî ame îlan kerdene. Dejêk ke neyeno pênas kerdene, serê zerrîya ma ser de wenişt. Pêşeng û fermandarê ma ke ez bi xo nêzdî ra înan şinasnena şehîd kewtî.
Peynîye de çîyo ke wazena binusa no yo: Şarê ma ganî nê çêranê ke bîyê malê tarîxê ma rind bişinasnê. Ganî ma şexsîyetê înan ser o cigêrayîş bikerê. Taybetmendîyê înan bizanê. Ajanê neweyan ra vajê. Goşanê şenikanê xo de bikerê deyîr. Çunke manewîyatê netewî nê çêranê tarîxîyan ra yeno. Nêverdanê seba nê çêran ezayî bêrê ronayene. Mezelanê şehîdan, vakurê Kurdistanî de rijnenê. Dişmen nêwazeno ke ma nê çêranê xo ra manewîyat bigîrê û pê xo bi hêz bikerê. Na rastîye hetê dişmenî ra yena zanayene. Çi rê sey şar ma nêzanê ke!
Nêwazena binusa la wa bêro zanayene, çêranê ma ra xeylî dimilî est ê. Nînan ra yew zî Mihemed Karasungur o. Fermandaro yewin yê şorişê ma yo. Ganî şarê ma xo nêzanîye dest ra bireyno. Tesîrê piropagandaya dişmenî de nêmano. Şaro dimilî/kirmanc/kird/zaza nê tarîxê ma rind bimuso. Dekewo têkoşînî mîyan. Bê guman vatişê mi seba têkoşer û welatperweran nîyo. Ez wazena bale bianca kesê ke kîşte de vindenê û temaşe kenê. Bêrê, ma pêr û pîya dest bierzê dawaya xo. Tay mendo ke ma biresê ciwîyayîşêko azad, demokratîk, seyyewbîn û bi keramet.
