Se Beno?

Ewro 06.06.2025

Ewro Îsraîl gale berd Îranî ser. Îran de fermandarê yewin û tay fermandarê bînî, dinyaya xo bedilna. 6 kesê ke atomî ser o girweyenê û pispor ê zî dinyaya xo bedilna. Ma na rewşe ra çi fam bikerê?

Sere de Îran nêeşka fermandarê xo yê yewin bipawa. Nêeşka fermandarê ke sereke yê bipawa. Kîşta naye de zî pisporê xo kerd vindî. Naye zî seba Îran zeîfîya girde ya. Yo bîn zî dewlet netewa ke nêeşkena fermandarê xo yê pêroyî bipawa, tirêm do senî netewa xo bipawa?

Şer û pêrodayîşan de babetê sereke îstixbarat o. Badê cû teknolojîyo raver viste yeno. Eke teknolojî raver bo û îstixbarat çin bo yan zî zeîf bo, teknolojî seke yeno waştene encam nêgeno. Nê 2 dîyardeyan ra dima yo binyatî yo, taktîkê şer o. Ganî taktîk rast bo ke encam bigîro. Seba şer ganî sîyaset û dîplomasî bêro kerdene. Zemîn bêro meşrûkerdene ke ver bi şerî de nêrazîbîyayîşî nêbê. Çunke dinya gilobal a. Dewletî yan zî netewî eşkenê vera şer de vinderê yan zî paştî bidê ci. Heke şêligê (girse, kitle) demokrat, şêligê duştîya şer kenê, bikewê mîyanê têgêrayîşî eşkenê şeran vindarnê.

Şerê Îran û Îsraîl şerê hegemonya yo. Hetê Îsraîl de NATO û xeylî dewletê dinya yê bi tesîr est ê. Hetê Îranî de zî Çîn û Rusya est ê. Yanî dinya hetê nê dewletan ra bîyo 2 lete. Heta ke nê dewletî est ê, ser rîyê dinya de tim do şerî zî est bê.

Şer Rijnayox O

Xopawitişî ra teber heme şerî rijnayox ê. Seserra 20ine û seserra 21ine de yeno dîyene ke êdî şerî vêşane benê sebebê rijnayîşî. 2-3 serranê peyênan ra biewnê, Ukrayna de kam serkewte yo? Çi bi netewa Ukrayna ame? Xezza de se bî? Xezza de serrêk de 50 hezar kesî merdî. Se hezar ra vêşî merdimî bî dirbetin. Bi milyonan merdimî bîyê macir. Qandê çi? Qandê dewletanê girdan û seba hegemonyaya înan. Na hegemonya de ne şarê DYA ne zî yê Îsraîl çîyêk bi dest nêfînenê.

Çekê şeran êdî zehîrin ê. Nê şerî sey şerê şimşêr û mertal (qalxan) nîyê. Nê şerî hewa kenê zehîrin. Hard kenê zehîrin. Awe kenê zehîrin. Heywanan çin kenê. Îmkanê ciwîyayîşî seba heme gandaran kenê çin. Coka şer rijnayox o. Ganî her kes duştê ci de vindero.

Şarî Se Bikerê?

Tewr tay 75 hezar serrî yo, komelî xo raver fînenê. Her ke şono merdim beno merdim. Texrîben 6 hezar serrî yo, mezgê merdimîye de rayîr ra vejîyayîş zî est o. Qandê cu komelî hem wazenê xo raver berê hem zî vera mezgê rayîr ra vejîyayo têkoşîn kenê. Yanî têkoşîno seba komelêko raver wina beno 2 hetî.

Ez bêrî ewro. Ewro formê komelan netewe ser ra awan beno. Netewan ke xo bi hewayêko rast awan kerd, benê bextewer. Netew dewletan çi ard bi serê netewan yeno zanayene. Coka Rayber Apoyî Netewa Demokratîke raver vist. Piratîk de zî ame ceribnayene. Nika yeno dîyene ke reynayîşê (xelisnayîş) şaran, taybet şerî dest ra, bi Netewa Demokratîke beno. Heta nika tu kesî sewbîna rayîr nêdîyo.

Ganî her netew verê xo bido felsefe, îdeolojî, sîyaset, xoperwerde kerdiş û xorêxistin kerdişî. No zî bi kesanê sade beno. Bi Rayberêk û kadroyanê pêşeng beno. Bi judenratan nêbeno.

Çareserîye!

Ganî netew durî dewlete, nêzdî xo bo. Çunke netewêk dewlete bipawo, mana xo îqtîdarî paweno. Heke netew xo bipawo, erjanê xo paweno. Newet dewlete bipawo, sîyaseto qilêr paweno, eke xo bipawo, bi sîyaseto netew piroblemanê xo çareser keno. Eke netew dewlete bipawo, exlaq û qanûnê dewlete paweno ke no zî seba sinifa serdest o. Yanî netew menfaatê sinifa serdest paweno. Heke netew exlaq û qanûnê komelkî bipawo, o wext rasterast xo paweno. Heke netew dewlete bipawo kultur, huner û edebîyatê serdestan paweno. Eke netew xo bipawo kultur, huner û edebîyato ke tarîx ra yeno paweno û nînan raver beno. Merdim eşkeno wina seba heme dîyardeyan bifikiryo.

No het ra Rayber Apoyî vernîya netewan akerdo. Qandê cu vengdayîşê 27ê sibate yê 2025î zaf girîng o. Vernîya netewan akerd. Zaf rast û bi metodo çareserker mudaxale kerd. Seba ke karêko zaf serkefte yo, hende êrîşê îdeolojîk, sîyasî, pisîkolojîkî yenê kerdene. Bê guman no zî yew peyme yo. Gama ke erzîyena her çiqas rast ba, hende zî vera ci da hetê duştan ra duştîye yena kerdene. Tam nê wextî de Rayber Apoyî têgihê Judenrat vist vernîya ma. Ma dî ke tewr zaf nê judenratî duştîye kenê. Xora ameyêne zanayene la rêyeka bîne zî rîyê xo yê xayin mojnayî ma.

Sey netewa kurd ma xo awan kerdo. Dewrê newî de ma do xo zîyadêr awan bikerê û raver biberê. Bi no têkoşînê xo ma do peynî bi şerê kurdan û tirkan bîyarê. Ma do way û biratîya netewan raver biberê. Ma do rast têkoşîn bikerê ke vernîya şerê Ukrayna da beno bigîrê. Ma do kayê ke DYA, Îran kenê bixeripnê. Ma do nêverdê ke hegemonyaya dewlet netewa Îsraîl raver şiro. Ma do winî bikerê ke bi têkoşînê xo netewa Îsraîl û Îranî bîyarê têhet. Bikerê way û birayê yewbînî. Ma do netewa filistînîyan û ya îsraîlîyan bikerê way û birayê yewbînî. Ma do pêde-pêde ciwîyayîşêko bê şer raver bifînê. Hedef û amancê ma yo sereke no yo.

Keso ke kîşta nê têkoşînî de vindero, çi dest ra ame bikero, beno şa. Kamo ke judenratîye bikero, do vindî bibo şiro. Naye ra meqset kiştiş nîyo. Vera nînan de bi pêtî têkoşînkerdiş o. Nê warî de bawerî bi netewa kurd û netewê bînan est a. Coka serkewtişê ma zî qetî yo.

👉keyepelê vîdyoyan: https://kiner.info/