2025 Serrêka Balantoxe

Serra 2025î

Na serre beno ke ameyoxî de dahîna biba girîng û bêra erjnayîş. Çunke na serre de serebûtê şorişgêrî ameyî were. PKK rew ra waştêne xo bivurna. Xo fesix bikera û rayîrê partîya newîye akera. Serranê 1990î ra nat wazîyeno ke vurnayîşî bibê. Labelê nêbîyêne. Badê vurnayîşê stratejî reyêk de PKK fesix bî, labelê ma neçar mendî ke newe ra awan bikerê. O wext şert û şirûtî nêverda ke pêvajo şiro sere.

Şerê 10 serran (2015 ra heta 2025) pêt bi. Şert û şirûtê vurnayîşî viraşt. Hetê bînî ra zî rewşêke ameye were. Hêzanê kapîtalîst-emperyalîst-hegemonîst wazenê pergala dinya newe ra awan bikerê. Merkezê nê awankerdişê newe zî Rojhelato Mîyanên o. Coka na rewşe zî tesîr kerd ke serra 2025î serranê bînan ra cîya ba. Coka serê şaran bîyo têmîyan. Her kes pers keno vano ke tirêm do se bibo?

Awe ke herekîyena şona, rayîrê xo zî vînena. Eke seba netewan vurnayîş ganî bo, netewe xo mîyan ra serek û kadroyan vejena û xo resnena yê newîye. La rewşe a rewşe nîya. Hêzê hegemonî awe kirişnenê hêgayê xo ser. Eke winî nêbîyêne kurdan bi şorişê xo û şaranê Rojhelatê Mîyanênî zî bi wisarê şaran do bieşkayêne xo biresnê pergal û ciwîyayîşêkê neweyî. Qandê cû şar yan zî mavajî netewe ganî awe bikirişnê hêgayê xo ser. Eke winî nêbo hêzê hegemonî dalpeyek awe zî netewan rê nêverdanê.

Rewşa Netewan

Bi taybetî seserra 21ine de şarî zeîf ê. O hêz û xorêxistinkerdiş çin o. Coka problemî hetê netewan ra nêyenê çareserkerdiş. Hêzê hegemon zî xora çareserîye nêwazenê. Şerî benê zêde û benê vila. Rewşe wina bena kaos. Herinda partî, serek û rêxistinanê şorişgêran, rêxistin û partîyê çete-îslamîst raver fînenê. Peynîye de ma dîmenderan de netewanê azadan nêvînenê. Ma serebirnayîş, tecawizkerdiş, talankerdiş û cayê xo ra bîyayîşê şêligan (girse-kîtle) vînenê. Ma tim vanê boka wina nêbo la tim wina beno.

Na rewşe ver tekane çare est o ma ver de. O zî no yo ke ganî ma şarê kurdî zîyadêr bi rêxistin bikerê. Zîyadêr têkoşîn bikerê. Bi ma ya zî şaranê bînan do sere wedarê û bi hawayêko rast têkoşîn bikerê. Bi no tewir ma eşkenê netewan, koman û şêligan destê hêzanê hegemon û çeteyanê înan ra bireynê (bixelesnê).

Netewa Demokratîke

Formo tewr hol Netewa Demokratîk a. Wayîrê nê fikrî Rayber Apo yo. Fikir vakurê Kurdistanî de û rojawanê Kurdistanî de piratîze bîyo. Hem seba pawitişê netewan hem zî seba raverberdişê netewan girîng o. Heta nika fikrê Netewa Demokratîke ra holêr çi fikir nêvejîyayo.

Netewa demokratîke fikrê pîya ciwîyayîşî yo. No fikir kamî rê yeno eşkerakerdene vêşane kes ci rê wayîrîye keno. Her keso ke welatperwer, demokrat û azadîwaz o, seba Netewa Demokratîke kar keno. Kes, rêxistin yan zî partîyê sîyasî eke hêzê hegemonî ra bestaye nêbo, sere û çimanê xo ser ra nê fikirî qebul keno.

Têkoşînê ma domîyeno. Peynî nêbeno. Bê mabên yeno kerdene. Her ke şono têkoşînê ma beno global. Çunke Rayber Apo destpêkî ra nat reynayîşê merdimîye xo rê kerdo amanc. Metodo bingeyên zî no yo ke kurdî çiqas raver şirê eşkenê netewanê bînan zî kaş kerê û raver berê. Bi no tewir nika ra Rayber Apo bîyo Rayberê merdimîye. Pêroyê dinya de, xeylî welatan de kes û rêxistinî est ê ke wayîrîye bi Rayber Apo û fikranê ci kenê. No zî seba têkoşîn û ameyoxî zaf girîng o.

Partîya Enternasyonale

Senî ke laş bê sere, sere bê mezg nêbeno, têkoşîno şorişgêr zî bê Rayber û partîye nêbeno. Coka dewrê newî rê Rayber û partî nêbo nêbeno. Rayber est o. Fikir raver visto û têkoşîn kerdo. Nika Rayber gamanê dahîna girdan erzeno. Rayber wazeno partîyêka enternasyonale saz bikero.  Amadekarî yenê kerdene.

Partîya enternasyonale sere de têkoşînê kurdan do biba sere. Netewanê bînan ra pîya ma do têkoşînê xo hîra bikerê. Pêroyê Tirkîya û vakurê Kurdîstanî de hewcedarî bi nê têkoşînî est o. Eke ma Sûrîye ra biewnê, kurdî, durzî, elewî û sunnî na xebate kenê. Pêde-pêde ma do netewan û komanê dînan biresnê yewbînan. Zemînêk hol ameyo awankerdene. Naye ra wet maneno mojnayîşê hunerê têkoşînî.

Problemê Filistîn û cihûyan zî bi no metod çareser beno. Yemen, Îran, Îraq de zî bi Netewa Demokratîke problemî asan çareser benê. Bi şertê ke netewe xo rêxistin bikerê.

Kurdî Benê Pêşengî

Ez bawer kena ke sey dewrê neolîtîkî, Zerdeşt û Medan kurdî benê serkêşê merdimîye. Ma xonewekerdişêkê tarîxî kenê. Verê ra zîyadêr hem kes, hem komel, hem rêxistine û hem zî partîye do bêrê na partîye mîyan û do têkoşîn bikerê.

Koyanê Kurdistanî de, rojawanê Kurdistanî de û welatanê cîya-cîyayan de dost û enternasyonale est ê. Partîya ma ya newîye ma ana pêser. Ma zîyadêr nêzdîyê yewbînan kena. Bi no hewa ma do xo dinyaya kapîtalîste dest ra bireynê. Ma do xo biresnê dinyaya xo. Ma do xo biresnê azadî û weşîya xo.