Şoriş û Dûştîye
Pîrozkerdiş
Ma şorişê rojawanê Kurdistanî, vakurrojhelatê Sûrîye, pîroz kerd. Nê pîrozkerdişan de dewlet çin bî. Qandê cû merasîm û seremonîyê dewletan zî çin bî. Pirotokol û kesê bi qirawat çin bî. Marşa netewî, alaya netewî, ziwanê netewî est bî la ê zî hende muhîm nêbi. Nê sembolî pîroz nêvînîyenê. Hetê bawerîyan ra zî hema vaje heme bawerî est bî. Tena yew dîn, nînan mîyan ra zî yew mezheb nêbi. Heme dînî, mezhebî est bî. Xora şorişê komelkî wina yê. Ganî wina bê.
Eke ma pers bikerê û vajê her kesî şoriş pîroz kerd? Ney! Her kesî şoriş pîroz nêkerd. Tu cayan de zî se ra se şar nêyeno û şorişî pîroz nêkeno. Ê kesê ke seba şorişî ked û gonî danê, ê kesî şoriş pîroz kerd. Kesê ke dûştê şorişî de vindertî xora şorişî pîroz nêkenê. Şoriş se ra neway seba merdiman o. Labelê beno ke se ra desê komelî şorişî seba xo nêvîno. No zî asayî yo. Heme cayan de zî wina bîyo. Tay cayan de zî kesê ke şorişî nêwazenê ê şîyê cayanê bînan. No zî yew rastîya şorişan o.Tay
kesî zî est ê ke verê ra heta nika dûştê şorişî de xebitîyenê. Tayê ci nimitkî û tayê ci zî sîyasî û aşkera dûştê şorişî de vindenê. Naye zî porsuk rastî ya. Ganî ma naye bizanê û xo bipawê.
Xopawitiş
Bi servistişê şorişî heme çîyî zelal nêbenê. Şorişî mîyan de zî ganî merdim şoriş bikero. Naye ra ver ganî şoriş bêro pawitene. Pawitiş senîn beno? Verê verkan çekî yenê vîrê merdimî. Rast o ke şoriş bi çekan yeno pawitene. Labelê tena bi çek xopawitiş qîm nêkeno. Çunke seserra 21ine de zanist û teknolojî şîyo raver. Coka metodê têkoşîn û xopawitişî vuryayo.
Ganî ma xo û şorişê xo hetê îdolojî ra zî bipawê. Ganî ma nêverdê ke dewletê dagirker û tay partîyê kurdan serê komelê ma bikerê têmîyan. Ma rastîyan bi hewayêko rast bimojnî komelî. Çunke komunîkasyon winî keno ke serê merdiman keno têmîyan. Komunîkasyono ke destê dewlet û şîrketê ke tayê ci dewletan ra girdêr ê de yo, duştê komelî de bi hewayêko zaf xirab yenê bikar ardene. Ê winî kenê ke sîya sey sipî mojnenê. Xirabîye sey holîye mojnenê. Welatî verê çimanê merdiman de kenê sîya. Winî kenê ke merdimî welatê xo teriknenê û verê xo danê cayanê dûrî û teberê welatî.
Her roj hetê sîyasî ra xeberan vila kenê û nêverdanê ke bi hewayêko rast komel xo ser o bifikirîyo. Wina ê xizmetê xo kenê. Labelê ganî merdim aya bo. Merdiman rêxistinî ra dûrî fînenê. Keso ke rêxistinkerde nêbo beno nêçîrêko asan û keweno destê nê dewletan û şîrketanê girdan. Ganî no het ra zî xopawitiş est bo.
Ziwan û kulturê ma bi kok û kan o. Ganî ma wayîr bi ziwan û kulturê xo bivejîyê. Raver biberê û biseveknê. No zî bi kede û têkoşînî beno. Heke her kurdo welatperwer û têkoşer kultur û ziwanê xo xo rê bikero binyad, do raver şiro û vera dagirker û dişmenan de serkewte bo.
Xiyanet
Heme şar û komelan ra zîyadêr ganî şaro kurd xiyanetî ser o mezgê xo bixebitno. Çunke kurdan zîyadêr xiyanetî ver kerdo vindî. Nika zî xiyanet est o. Beşek kurdan hîna zî xiyanetî pênase nêkeno. Qandê cû têkoşer û xiyanetkaran sey yewbînî vîneno. No zî zirar dano têkoşînê azadîye.
Hetêk ra başûrê Kurdistanî de gerîlayî danê piro. Heto bîn ra kurdo xayin leşkeranê tirkan ra pîya êrîşî gerîlayan keno. Gerîlayî teknolojî bikar anê û heme kerdişanê xo û yê dişmenî û xayinan kenê belge. Hem vîdyoyan pare kenê hem zî fotografan pare kenê. Çi heyf ke beşekê qij bo zî komelê ma de merdimî nê vîdyo û fotografan nêvînenê. Tay kesî zî est ê ke nêwazenê bivînê. No zî zirar dano têkoşînê azadîye yê kurdan.
Têgêrayîşê Azadîye yê Şaro Kurd na rey nêverdano ke xayinan ver têkoşînê ma bibin bikewo. Her çiqas xayinî hêz bidê dişmenî zî kurdo azad do bi ser bikewo. Yo girîng oyo ke merdim hetê xo dîyar bikero. Goreyê ey zî bi hewayêko serkewte têkoşîn bikero.
Qisaya Peyêne
Dinya vurîyeno. Pergala ke est a mergî ver a. Do çin biba û şira. Rayîrê ke ma xo ver de rast kerdo, rayîrêk rast o. Kurdî bi têkoşîn û keda xo benê pêşengê şaran. Kurdî rayîr akenê. Hedefî mojnenê. Kurdan pîya bi no hewa merdimîye do xo biresno pergal û ciwîyayîşêko newe.
Bitikne 
